Xehetasunak

Jose María Lizundia

Pilar Lloves idazlearen hirugarren eleberria aurkezten dugu, "Que nadie se apiade de mí" izenburua daramana eta Editorial Nimbo argitaletxearen eskutik plazaratua.

Pilar Llovesek berak bere burua “sentimenduen narratzaile” moduan aurkezten du, eta bide horretan bere hirugarren eleberria da honakoa. Harrapatu eta zalantzan jartzen zaituen istorio bihotz-erdiragarri bat da, bertan iraganak eragiten duen mina eta orainaldian dituen ondorioak jorratzen direlarik, hori guztia itxaropen izpi batekin ikusia. 

Liburu honetatik zer nabarmenduko luke gehien galdetu diogu Pilarri berari: “ ‘Que nadie se apiade de mi’ gure mundu bakartiaren islada leiala da. Gure garaiko giza gertaerak aztertzea, pentsatzea, sentitzea, berriro bizitzea ahalbidetzen digun sormen lan bat da, eta horren inguruan gure buruari galdegitera eramango gaitu, tramaren irtenbidea aurkitu arte. Liburu honetan poliziako eta erromantiko bitartean dagoen trama bat dago, suizidioari buruz puri-purian dagoen eztabaidarekin”. 

Eskerrak ematen dizkiogu Pilarri bere hitzengatik eta arrakasta handia opa digu eleberri berri honekin.

Berri hau aprobetxatzen dugu gogorarazteko datorren urtarrilaren 19an, 19:30etan, Pilarrek  Asociación Ensanche XIX elkarteko “Encuentros con la Cultura” jardunaldian parte hartuko duela, bertan Javier Otaola gure kideak elkarrizketatuko duelarik. Topaketa Zoon bitartez egingo da. Sartzeko gakoak honakoak dira: Bilera ID: 890 5838 2788. Sartzeko kodea: 226459.  

Xehetasunak

width="280"

Atsegin handiz iragartzen dizuegu Blanca Sarasua Euskadiko Idazleen Elkartera batu zaigula.

Bilbon jaiotako idazle eta poeta honek berrogei urterekin ekin zion idazteari. Bere lehen liburua Cuando las horas son fuego, 44 urterekin argitaratu zuen. Ordutik hona hamar obra gehiago plazaratu ditu: El cerco de los pájaros (1986); Ático para dos (1989); Ballestas contra el miedo (1990), honakoak Arabako Aldundiko Ernestina de Champourcin Saria irabazi zuelarik; ¿Quién ha visto un ambleo? (1994); Rótulo para unos pasos (1997); La mirada del maniquí (2000); Coyunda recia (2005); Música de aldaba (2008). XIX San Juan de la Cruz Nazioarteko Poesia Saria; Baciyelmo (2012); Adagio para un silencio (2016), eta Stop (2019).

Mintzaira aberatsa baina soila erabiltzen du, eta bere poesiak errima eza du ezaugarritzat. Bertso libreen edertasunean sinesten du, baina estetikoaz haratago joan beharra dagoela iritzi du ere. Poesiaren sakontasuna aldarrikatzen du, bai eta klasikoetara itzultzeko beharra ere, betiereko baloreen iturri baitira.

Musika atsegin du ere Sarasuak eta poesia mundua ikusteko beste modu bat bezala ulertzen du, eta bere liburuetako batzuetan, hots Música de Aldaba, bere belaunaldiko poeten egoera kritikatzen du.

Hamar antologiatan gertutik parte hartu du. Aldizkari literarioetan kolaborazioak egin ditu ere, hala nola Zurgai,​ Albor (Academia Castellano y Leonesa de la Poesía-k argitaratua), Amilamia, Alborada, eta El Correo edo Diario de Ávila egunkarietan ere, besteak beste.

Ongietorria AEE/EIEra Blanca!

Xehetasunak

 

Urte berriari hasierari emateko iazkoaren bide beretik ekingo diogu, gure bazkideen obrak aurkeztuz alegia.

Honakoan Juan Ignacio Montianoren bi obrari helduko diegu: "Cornadas" eta "Los crímenes del valle".

Horietatik lehena “Cornadas” da, 2019an argitaratutako eleberria, hari buruz bere egileak berak hitz egin digularik:

«1995ean nire lehen eleberria argitaratu nuen, El cadáver de Porqueriza, eta bertan Luis García Otwen inspektorea sortu nuen. 1997ko  Zaino  eleberrian beste pertsonaia batzuk iritsi ziren, hots Perla Pérez, Usagüés, Zaino... Baina orain dela hiru urte sortu nuen pertsonaia hauen historia guztia batzen zuen eleberria.  "Cornadas”. 

»’Cornadas’ genero beltza eta fantastikoa elkartzen dituen eleberria da, bertan pertsonaiak bi mundu paralelotan mugitzen direlarik. Elkar topo egiten duten bi mundu paralelo, elkarrekin nahastuz. Batak bestea begiratu gabe elkarrekin bizi diren bi mundu. Batak bestearen susmoak dituen eta elkarri zelatan dabiltzan bi mundu...»

 

 

 

 

Gaur aurkezten dugun Juan Ignacio Montianoren bigarren obra "Los crímenes del valle" da, iaz argitaraturikoa. Eleberri beltza, lehen lerrotik harrapatuko zaituena, hona hemen duzue bere sinopsia:

Neska gazte bat Deba ibaian hilik agertzen da, Arrasatetik gertu. Gorpua agertzeko modu ikaragarriak eta desagerturik daraman denborak mundu guztia urduri jarriko du.

 

 

Xehetasunak

Iñaki Sainz de Murieta gure bazkideak bere bi azken nobedade literarioak aurkezten dizkigu: "Narraciones y leyendas vascas" (Verbum Argitaletxea) eta "El tejo y el petirrojo" haurrentzako liburua. 

Bi liburu hauei buruz Iñaki Sainz de Murietari berari galdetu diogu eta hauek izan dira bere erantzunak:

Galdera – Hitz egiguzu “Narraciones y leyendas vascas” liburuari buruz. Zer nabarmenduko zenuke?

Erantzuna – Denbora dezente landu dudan liburua da eta forma ematea kostatu zait ere, narrazioak eta kondairak fikzioaren bitartez lotzen saiatu bainaiz, baina horien nukleo tradizionala ahaztu gabe. Hori guztia publiko heldu batean pentsatzen egin dut, nahiz eta izaera tradizionala duten obra mota hauen freskotasuna mantentzen duen. Bertan Mariri, Aralarko Mikel Deunari, lamiei eta Euskal Herriko mitologiako numen ezberdinei erreferentziak aurkituko ditugu, baina baita ere gure arbasoek duela mende bat zituzten bizi baldintzei ere.

Errealismo magikoaren korrontearen baitan kokatu daitekeen obra da horren guztiaren ondorioa, nahiz eta mitoen berregokitzapen lanaren ondorio zuzena izan, sinesmenen esparruan kokatzen baitira.

G – Zer esan diezagukezu “El tejo y el petirojo” haurrentzako liburuari buruz?

E -  Lierni Celarainekin batera garatu dudan proiektua da, 3D/2D artista ospetsuarekin alegia, eta AMAZONen bitartez plazaratu berri da, munduko edozein txokotan ia momentuan eskuragarri dagoelarik, izan ere beste argitaletxeek askoz ere mugatuagoa zen banaketa eskaintzen ziguten.

Helarazi nahi genuen mezuari eta detaile txikiei garrantzia handia eman diogu, hala nola hizki larri eta xeheen erabileran, horrek adin txikietan irakurketa eta idazketaren oinarrizko tresna eta estrategiak lortzea mesedetzen baitu.

Dena ongi badoa, hurrengo pausua beste hizkuntzetara itzultzea izango da, euskarari lehentasuna emanez, bai eta elkarrekin beste proiektu berriak planteatzea ere.

G – Proiektu hauetaz gain, Gesernet Argitaletxearen kontakizun solidarioen proiektuetan bete betean sarturik zaudela badakigu. Antologia solidariorik ba al da bidean?

E – Momentuz ez dago ezer itxita, baina hirugarren argitalpen solidario bat burutzeko aukera egotea espero dut, hori oso berri ona izango baita. Egia da baina oso arduratsuak izan nahi dugula fundazioaren aukeraketarekin. Bestalde, datorren urtean GESERNET argitaletxearentzako beste kolaboraziozko argitalpen sorta bat planteatuko da, hortaz horri buruz berri emango dizuedala hitz ematen dut.

G – Eta, zure beste proiektu bati buruz hitz eginez, "Kanideren abenturak" bildumari buruz berririk edukiko dugu?

E – Horretan lanean nabil. Zazpigarren alea plazaratu baino lehen premiazkoagoak diren beste proiektu batzuk amaitu behar ditut, Migueli gertatzen zaion moduan, baina argitaletxeak hori badaki eta planifikazioan egokitzean dago koxka. Datorren urtean sailaren ale berri bat argitaratzea espero dut.

Eskerrak ematen dizkiogu Iñaki Sainz de Murietari bi nobedade hauek eta lanean dabilen beste proiektuetako batzuk gurekin elkarbanatzeagatik. Hoberena opa diogu horiekin guztiekin.

Xehetasunak

"Aurora Misioa" aurkezten dugu, Julio Santos eta Patricia Pérezek sortutako Txano eta Oscarren abenturak sagararen bederatzigarren alea.

Txano eta Oscarren liburu guztiak bezala, “Aurora Misioa” euskaraz eta gaztelaniaz plazaratu da, paperan eta digitalean, Xarpa Books argitaletxearen eskutik autoargitaratua. Abentura honi buruz gehiago jakin nahi baduzu booktrailer hau ikus dezakezu.

Aurten gainera, Txano eta Oscarren bizitzan eta bilduman ere beste gauza oso interesgarriak gertatu dira.

  • Bildumaren lehen hiru aleak galizieraz eskuragarri daude jada.
  • Katalanez bi liburu berri agertu dira, horrela bostgarrenera arte eskuragarri daude.
  • Bildumaren  lehen hiru aleak alemanieraz plazaratzeko zorian daude.
  • Berritasun hauekin guztiekin, Txano eta Oscarren abenturak zazpi hizkuntzatan irakurri daitezke jada: gaztelania, euskara, katalana, galiziera, ingelera, portugesa eta alemaniera.
  • Gainera, Latinoamerikan liburu guztiak salneurri lehiakorrean eskuratu daitezke jada, eskaerapeko inprimatzearen bitartez.

Julio Santos eta Patricia Pérez “Aurora Misioa” liburuari buruz pertsonalki hitz egitea nahi izan dugu. Hemen dituzu haien iritziak: «Txano eta Oscarren sagaren bederatzigarren liburu hau arrazoi ugarigatik da oso garrantzitsua da guretzako: alde batetik, istorioen dinamika aldatzen du. Orain arte abentura guztiak udako oporretan gertatzen ziren, baina abentura honetan uda amaitu egiten da eta ikasturte berria hasten da. Eszenatoki berriak daude, pertsonaia berriak. Protagonistak goibel daude, etxekolanen eta azterketen artean abenturak amaitu direla uste baitute. Baina klaseak hasi bezain laster, sorpresa ederra hartzen dute eta ikasturtean zehar argitu beharreko misterioak ere badaudela ohartzen dira. Gainera, abentura hau magiaz beterik dago eta “Konjuru eskarlata” gure bostgarren liburuko pertsonaiak berreskuratzen ditugu.

»"Aurora Misioa” bildumako pertsonaietako batentzako inflexio puntu bat da, beste saga bati hasiera eman diezaiokeen atea irekitzen duen erabaki bat hartu behar baitu. Ikusiko dugu hori errealitate bihurtzen ote den.

»Bestalde, liburu honekin urtean bi liburu plazaratzeko dinamikari helduko diogu berriro, izan ere 2020 urtean, pandemia tartean, bakarra atera ahal izan genuen.

»Gainera, poz pozik gaude Euskal Herrian 8 urtetik gorako haurrek gehien irakurtzen duten saga moduan finkatu garelako, eta hori Youtuber ospetsuak izan gabe».

Eskerrak ematen dizkiogu Julio eta Patriciari emandako erantzunengatik eta hainbeste berri onen aurrean zorionak eman nahi dizkiegu. Txano eta Oscarren saga ezin hobe doa eta etengabe ari da handitzen, horrek asko pozten gaituelarik. Abentura eta itzulpen berrien zain egongo gara... eta agian egongo den saga berri horren zain ere.